Klæmint fekk sínar fyrstu minuttir í bestu deildini tann 20. mai 2007, bert 16 ára gamal.
Klæmint byrjaði sum sjey ára gamal at spæla fótbólt við Løkin. Tað sást tíðliga, at ungi rituvíkingurin hevði góðar dygdir og gott máleyga. Hann kláraði seg væl, og umboðaði eisini ungdómslandsliðini á bæði U15, U17, U19 og U21.
Klæmint fekk sínar fyrstu minuttir í bestu deildini tann 20. mai 2007, bert 16 ára gamal, og var við til at vinna fyrsta og einasta føroyameistaraheitið í bestu deildini fyri NSÍ hetta sama árið. Hann skoraði sítt fyrsta mál í bestu deildini tann 17. mai 2009 og tað má sigast, at nógv vatn er runnið í ánna síðani tá. Klæmint hevur skotið 239 mál í bestu deildini, og er hetta føroyskt met fyri mest skorandi leikara í søguni. Klæmint tók málmetið frá Jákupi á Borg í Ólavsøkudystinum ímóti HB í Gundadali tann 28. juli 2018, tá hann skoraði mál nr. 154 í bestu føroysku deildini. Tað merkir eisini, at hvørjaferð Klæmint fær bóltin inn um mállinjuna, veksur málmetið.
Klæmint hevur somuleiðis metið fyri flest spældar dystir fyri NSÍ í bestu deildini.
Klæmint umboðaði fyrstuferð føroyska A-landsliðið hjá monnum í 2012. Hann hevur síðani spælt 64 A-landsdystir og skotið 10 mál, sum eisini er málmet fyri mest skorandi A-landsliðsleikara. Metið deilur hann saman við Rógva Jacobsen, sum somuleiðis hevur skotið 10 mál fyri føroyska A-landsliðið. Klæmint valdi í 2024 at takka fyri seg á føroyska A-landsliðnum.
Harumframt hevur hann umboðað barndómsfelagið í 35 dystum í kappingini um Løgmanssteypið, 20 dystum í Europa League, tveimum dystum í Conference League og einum dysti í Champions League.
Klæmint hevur bert umboðað NSÍ í føroyskum fótbólti. Hetta er nakað vit í felagnum eru sera fegin um og takksom fyri.
Vit vilja takka Klæminti fyri hansara drúgva íkast í felagnum, og vilja ynskja honum og restini av hópinum góða eydnu í 2025.
(Hagtøl sambært www.faroesoccer.com)
.png)
