Vit minnast Pidda
Í annaðkvøld kl. 19 verður minningarguðstanæsta fyri Pidda í Glyvra Kirkju.
NSÍ ynskir eisini, at vit minnast Pidda í samband við dystin móti B68 við Løkin í morgin. Sum so nógv her á staðnum hevði Piddi eitt foreldur innanifrá og eitt foreldur uttanifrá. Tí er tað hóskandi, at vit minnast hann júst í hesum dystinum.
Piddi var í sínum uppvøkstri partur av Nes Sóknar Ítróttarfelag, sum tá hevði bæði hondbólt, fótbólt og róður á skránni. Piddi var dugnaligur kappróðrarmaður við Tjaldrinum og seinni Eysturoyingi.
Hann hevði altíð eina rúgvu av góðum hugskotum. Hann sá loysnir heldur enn forðingar – ein ígongdsetari í orðsins rætta týdningi.
Hetta fingu vit eisini at kenna í NSÍ, tá hann var formaður felagsins í 2007 og part av 2008. Málini vóru høg og hugflogið stórt. Og í 2007 rukku vit eisini einasta føroyameistaraheitinum higartil.
Vit øll, sum vara av og eru partur av NSÍ, vilja hervið minnast Pidda og takka honum fyri hansara leiklut í arbeiði felagsins og í samfelagnum her um leiðir.
Friður verið við minninum um Pidda.
Starvsnevndin