Dreingir U-14: TB/Royn-NSÍ 0-4

Eftir summarstøðgin var fyrsti dystur í landskappingini hjá U14a á skránni leygardagin. Á nýggja vøllinum við Stórá í Trongisvági tók TB/Royn ímóti teimum gulu. Í samband við dystin, høvdu fleiri foreldur leitað sær suður longu fríggjadagin, og fingu tey ein frálíkan túr burturúr. Tey búleikaðust í Froðba. Leygarmorgunin fór so restin av liðnum suður.
Líkindini at spæla vóru beinleiðis vánalig. 15 metrar av landsynningi og regn – nógv regn. Hóast vøllurin er nýggjur merktist, at vatnið ikki setir nóg væl undan, og tí vóru stórir hyljar og nógv vatn á vøllinum. Tað gjørdi tað sera trupult at meta um ferðina á sendingunum. Bólturin kundi ferðast við nógvari ferð og so brádliga støðga í einum hyli. Men tað var sjálvandi líka fyri báðar partar.
Fyrri hálvleikur var nakað linur. Okkara høvdu vindin og nógva regnið ímóti í fyrra hálvleiki. Teir royndu sítt besta, men bert einu ferðina komu teir til skot. Ov nógv smáspæl og og lítið gjøgnumbrot. Eisini vóru teir ov óneyvir við seinastu sendingunum. Vit fingu eini 5 horna og fríspørk frammi á vøllinum, men tey endaðu øll aftan fyri málið hóast mótvindin. Longu eftir 10 minuttir mátti Benjamin fara av vøllinum við skaða. Talan var um harða takling, har Benjamin mátti lúta.
Hinvegin høvdu tvørámenn og hvalbingar tríggjar góðar royndir móti okkara máli. Tvær ferðir vórðu teir sendir einsamallir móti Petur Sjúrði, men báðu ferðina vardi hann fyri. Eisini høvdu TB/Royn eitt skot á málið. Støðan í støðginum var 0-0, og tað áttu okkara at vera glaðari fyri.
Okkurt hevur Harry Knudsen, venjari, sagt leikarunum í steðginum. Frá byrjanini av seinna hálvleiki settu okkara seg á dystin, vunnu nærdystirnar og fingu meira bit í álopið. Tá einir 10 minuttir vóru farnir av seinna hálvleiki kom hol á. Eftir innlegg, har bólturin ferðaðist høvd av høvdi inni undir málinum hjá TB/Royn, endar bólturin fyri føturnar á Móritsi Heina, sum smekkar bóltin í málið til 1-0 til NSÍ. Og løtu seinni fara vit í snarálop. Mórits Heini sendir ein góðan bólt fram til Jóhan Nielsen, sum var við í dag. Jóhan sneiðir við bringuni bóltin víðari til Heðin Nielsen, sum, púra blankur við málmanninum, ísakalt kippir bóltin upp um málmannin og í tóma málið. 2-0 til NSÍ, og dysturin í roynd og veru avgjørdur. Men okkara vóru ikki lidnir enn. Seinastu minuttirnar fingu vit 2 mál afturat. Fyrst sneiddi dagsins maður, Sonni Mikkelsen, alla verjuna av og sendi bóltin inn fyri málið, har Mórits Heini skoraði sítt annað mál. Og í næstseinasta minutti gjørdi Sonni alt sjálvur. Hann var staddur í vinstru síðu, sneiddi einar tveir leikarar av og setti kós inn í banan har hann krúllaði bóltin hegnisliga upp í longar hornið. Ein sonn perla! 4-0 gjørdist endaliga úrslitið. Sum heild kann sigast, at fyrri hálvleikur onki var at skriva heim um. Men ein dystur hevur tveir hálvleikir, og í seinna hálvleiki sást, hvat av liðunum liggur nummar 2 í kappingini og hvat liggur nummar 9.
Komandi leygardag er stór avbjóðing á skránni. Tá skulu okkara leika finaluna í steypakappingini á Tórsvølli. Tann dysturin verður móti HB og byrjar kl. 10. Vónandi verða nógvir “gulir” áskoðarar til dystin. 12. maður – ella í hesum førinum 10. maður — hevur stóra ávirkan á ein tílíkn dyst.
Teir, sum mannaðu liðið í dag, vóru:
Petur Sjúrður, Rani, Mórits Heini, Benjamin, Sjúrður Pauli, Heðin, Pætur, Jógvan, Sonni, Sølvi, Jóhannus, Meinhard og Dávid.

 

Líknandi tíðindi